Na Emiratima je bilo 2:1 u korist tima Mikela Artete koji se tako vratio na pobjednički put nakon poraza od Aston Vile u prošlom kolu.
“Tobdžije” su se učvrstile na vrhu tabele sa 36 bodova, pet više od najbližeg pratioca Mančester sitija koji ima meč manje.
S druge strane popularni “vukovi” ostali su na dnu sa svega dva boda.
Sva tri pogotka viđena su u nastavku, a malo toga viđeno je u uvodnih 70. minuta. A onda je Bukajo Saka izveo korner, a lopta se od stative odbila do golmana Sema Džonstona, a potom od njegovih leđa završila u mreži.
Gosti su pokušavali da dođu do velikog boda, a činilo se da će uspjeti u toj namjeri kada je Nigerijac Arokodare glavom matirao Davida Raju nakon centaršuta mladog Mateusa Manea na isteku 90. minuta.
Međutim, nije odustajao Arsenal, krenuo je svim silama prema naprijed i to se isplatilo u 94. minutu. Saka je centrirao, a Jerson Moskera je u želji da otkloni opasnost ispred Gabrijela Žezusa glavom savladao svog golmana za veliko slavlje domaćih navijača.
